救唔到系列

今日懷住沉重嘅心情出呢個post。

機主陳生今日拎咗兩杯少奶嘅凍茶（利申：係我託佢買嘅），同埋佢部Macbook Pro 15" (2011 A1286) 落嚟。一路飲，一路講部機嘅事：

「上個禮拜老婆生日，我送份大禮畀佢 - 四日三夜台北遊。事關我都好耐無放假，決定連電腦都唔帶。嗱，你上過我屋企做on-site架啦，都知我啲電腦同啲磚頭書，打棟擺喺個電視下面啦。」

「去到台灣第二日，啱啱食完早餐諗住call車去玩，電話一攞上手管理處就打嚟：『喂，陳生？管理處呀，你屋企漏鹹水呀，麻煩你上嚟閂返個水掣。』WTF？漏鹹水？咁我返唔返香港好？」

陳生定一定神之後，好冷靜咁同自己講，唔漏都漏咗啦，決定繼續行程。

「What time is it?」老婆情深地用英文問。

「7。」

「邊個打嚟？」老婆再問。

「而我不知道是誰人打嚟。唔好理佢喇，車嚟啦，諗下想去邊啦。」如是者，陳生兩公婆好開心咁玩埋嗰幾日，之後返香港。

幾日後，返到屋企一開門，啲鹹水好似三峽排洪咁湧出嚟！重有幾個遙控、兩張櫈仔喺個廳度浮緊嚟。澗水行去廁所閂咗個掣，然後去點算下有咩損失。跟住見到嘅，不出所料，浮唔起嘅Macbook同啲磚頭書有兩寸濕咗。

頭先我一開部機，就係大家喺張相度見到嘅嘢。壞咗啲咩我唔想多講喇，不幸中之大幸係上個月先幫陳生upgrade嘅HDD無事，啲data絲毫無損。

對住一部救唔返嘅機，就算幾有經驗都好，都係好唔開心，只能夠幫陳生搵部二手Macbook嚟延續個HDD嘅生命。

RIP。